نائب وزیر اعظم اور وزیر خارجہ سینیٹر اسحاق ڈار 14 سے 16 جولائی کے درمیان چین کے شہر تیانجن میں منعقدہ شنگھائی تعاون تنظیم (ایس سی او) کے کونسل آف فارن منسٹرز(سی ایف ایم) کے اجلاس میں پاکستانی وفد کی قیادت کریں گے۔
ترجمان دفتر خارجہ کی طرف سے اتوار کو جاری بیان کے مطابق ایس سی اوکے تمام رکن ممالک جن میں پاکستان، چین، بیلاروس، انڈیا، ایران، قازقستان، کرغزستان، روس، تاجکستان اور ازبکستان شامل ہیں، کے وزرائے خارجہ اجلاس میں شرکت کریں گے۔
اس سیکشن میں متعلقہ حوالہ پوائنٹس شامل ہیں (Related Nodes field)
کونسل آف فارن منسٹرز ایس سی او کا تیسرا اعلیٰ ترین فورم ہے جو بین الاقوامی تعلقات کے مسائل کے ساتھ ساتھ ایس سی اوکی خارجہ اور سلامتی پالیسیوں پر توجہ مرکوز کرتا ہے۔
یہ فورم اعلامیوں، بیانیوں سمیت دستاویزات کی منظوری دیتا ہے جو کونسل آف ہیڈز آف اسٹیٹ (سی ایچ ایس) کے غور کے لیے پیش کی جاتی ہیں۔
سی ایچ ایس کا آئندہ اجلاس 31 اگست سے یکم ستمبر 2025 تک تیانجن، چین میں ہو گا۔
پاکستان کے نائب وزیر اعظم اور وزیر خارجہ سی ایف ایم اجلاس کے موقعے پر اپنے ہم منصبوں کے ساتھ دوطرفہ ملاقاتیں بھی کریں گے۔
