گوادر میں غیر قانونی ٹرالنگ میں اضافہ، فشریز حکام کی مبینہ ملی بھگت کا انکشاف
پسنی ( روزنامہ ایگل حب بلوچستان ) عزیز اسماعیل، جنرل سیکریٹری مکران ماہیگیر کوآپریٹو سوسائٹی نے اپنے ایک بیان میں انکشاف کیا ہے کہ ضلع گوادر میں غیر قانونی ٹرالنگ ایک مرتبہ پھر عروج پر ہے، اور جب بھی فشریز ڈیپارٹمنٹ میں نیا اسسٹنٹ ڈائریکٹر تعینات ہوتا ہے، ٹرالنگ کی سرگرمیاں بڑھ جاتی ہیں۔
انہوں نے دعویٰ کیا کہ محکمہ فشریز کی جانب سے ٹرالنگ کشتیوں کو مبینہ طور پر نمبرنگ جاری کی جا رہی ہے، جو اس بات کا ثبوت ہے کہ متعلقہ حکام نہ صرف خاموش ہیں بلکہ ان سرگرمیوں میں شریک بھی ہیں۔ ان کے مطابق، فشریز حکام کا اصل کام ٹرالنگ کو روکنا ہے، نہ کہ اسے تحفظ فراہم کرنا یا سہولیات دینا۔
عزیز اسماعیل نے موجودہ عوامی نمائندوں کی خاموشی پر بھی شدید تنقید کرتے ہوئے کہا کہ ان کی بے حسی اور عدم توجہی سے ظاہر ہوتا ہے کہ یہ سب ایک منظم ملی بھگت کا حصہ ہیں۔ انہوں نے بلوچستان حکومت کی خاموشی کو بھی ایک بڑا سوالیہ نشان قرار دیا۔
ماہیگیروں کی تنظیم نے حکومت سے مطالبہ کیا ہے کہ غیر قانونی ٹرالنگ کے خلاف فوری کارروائی کی جائے اور ملوث عناصر کے خلاف سخت ایکشن لیا جائے تاکہ مقامی ماہیگیروں کے روزگار اور سمندری وسائل کا تحفظ یقینی بنایا جا سکے۔
