پولیس حکام نے بتایا ہے کہ ہفتے کو پشاور کے سی ٹی ڈی پولیس سٹیشن میں بارودی مواد پھٹنے کے نتیجے میں ایک اہلکار چل بسا جبکہ دو زخمی ہوگئے۔
کیپیٹل سٹی پولیس افسر (سی سی پی او) میاں سعید کے مطابق: ’ابتدائی طور پر پتہ چلا ہے کہ دھماکہ پولیس سٹیشن کے بارودی مواد کے کمرے میں موجود پرانے مواد کے پھٹنے کی وجہ سے ہوا ہے۔ آگ دیگر اسلحے تک بھی پھیل گئی، جس سے مزید دھماکے ہوئے۔‘
اس سیکشن میں متعلقہ حوالہ پوائنٹس شامل ہیں (Related Nodes field)
میاں سعید نے واقعے میں ایک سی ٹی ڈی اہلکار کی موت اور دو اہلکاروں کے زخمی ہونے کی تصدیق کرتے ہوئے بتایا کہ ’ابتدائی طور پر واقعہ دہشت گردی کا نہیں لگتا۔‘
سی سی پی او کے مطابق تھانے میں موجود ’تمام ملزمان کو حوالات سے بحفاظت نکال لیا گیا ہے۔‘
واقعے کے بعد پولیس اور سکیورٹی فورسز نے علاقے کو گھیرے میں لے لیا۔
سی سی پی او میاں سعید کے مطابق کلیئرنس کا عمل جاری ہے اور ‘بم ڈسپوزل سکواڈ، ریسکیو اور فائر بریگیڈ کی ٹیمیں اپنی کارروائیاں جاری رکھے ہوئے ہیں۔‘
سرکاری ذرائع کے مطابق ایڈیشنل آئی جی سی ٹی ڈی نے تحقیقات کے لیے انکوائری کمیٹی تشکیل دے دی ہے، جو دھماکے کی وجوہات کا تعین کرے گی۔
