خیبر پختونخوا کے ضلع بنوں میں پولیس کے مطابق فرنٹیئر کانسٹبلری (ایف سی) لائن پر خود کش حملے کے بعد حملہ آوروں کے خلاف کارروائی مکمل ہوگئی ہے جس کے دوران تمام یعنی چھ حملہ آور مارے گئے۔
پولیس کے مطابق خود کش حملے اور اس کے بعد آپریشن کے دوران سکیورٹی فورسز کے چھ اہلکار بھی جان سے گئے جبکہ 16 اہلکار زخمی ہوئے جنہیں ہسپتال منتقل کیا گیا ہے۔
بنوں پولیس کی جاری کردہ تفصیلات کے مطابق عسکریت پسندوں نے بنوں میں واقع ایف سی لائن کی عمارت سے بارود سے بھری گاڑی ٹکرائی اور اس کے بعد اندر داخل ہونے کی کوشش کی۔
بنوں پولیس کا کہنا ہے کہ ’حملے کی اطلاع ملتے ہی ڈپٹی انسپکٹر جنرل بنوں ریجن سجاد خان اور ضلعی پولیس سربراہ سلیم عباس کلاچی کی نگرانی میں آپریشن کا آغاز کیا گیا جس کے دوران چھ حملہ آور مارے گئے۔‘
ایک سیکورٹی اہلکار 5 مارچ 2025 کو بنوں میں ایک آرمی کمپاؤنڈ میں دھماکہ خیز مواد سے بھری وین کے قریب پہرہ دے رہا ہے۔ ایک عسکریت پسند گروپ سے تعلق رکھنے والے خودکش بمباروں نے 4 مارچ کی شام کو شمال مغربی پاکستان میں ایک آرمی کمپاؤنڈ میں دو بارود سے بھری کاریں ٹکرائیں، جس سے بڑے دھماکے ہوئے اور نو شہری جان سے گئے تھے (کریم اللہ / اے ایف پی)
اس سیکشن میں متعلقہ حوالہ پوائنٹس شامل ہیں (Related Nodes field)
کارروائی میں حصہ لینے والے سکیورٹی فورسز کی اہلکاروں کے لیے صوبائی پولیس سربراہ(آئی جی) ذولفقار حمید کی جانب سے تعریفی اسناد اور نقد انعام کا بھی اعلان کیا گیا۔
عسکریت پسندوں کے خلاف تقریباً 10 گھنٹے جاری رہنے والی کارروائی کے دوران ایف سی لائن کے دونوں اطراف کے راستے سیل کیے گئے تھے۔
پولیس کے مطابق خود کش حملے کے نتیجے میں قریبی دکانوں عمارتوں کو نقصان بھی پہنچا ہے۔
بنوں میں اس سے پہلے بھی اس قسم کے شدت پسندی کے واقعات سامنے آئے ہیں جس میں بنوں پولیس کمپاؤنڈ پر حملہ بھی شامل ہے۔
اسی طرح 2022 میں بنوں سی ٹی ڈی کی عمارت میں زیر حراست عسکریت پسندوں نے ایک اہلکار سے اسلحہ چھین کر دیگر اہلکاروں کو یرغمال بنایا تھا۔
عسکریت پسندوں کے خلاف آپریشن کیا گیا تھا جس میں 25 عسکریت پسندوں کو مارا گیا تھا جبکہ 10 عسکریت پسند قیدیوں نے ہتھیار ڈال دیے تھے۔
