پسنی (روزنامہ ایگل حب بلوچستان)
کیسکو پسنی نے ماہ جون 2025 کے بجلی بلوں کی ادائیگی اور ریکوری اہداف کو یقینی بنانے کے لیے سخت اقدامات کا اعلان کر دیا ہے۔ سپرنٹنڈنگ انجینئر آپریشن مکران سرکل کی ہدایت اور ایکسیئن آپریشن ڈویژن کیسکو گوادر کے احکامات کی روشنی میں ایس ڈی او آپریشن سب ڈویژن پسنی نے تمام بجلی صارفین کو متنبہ کیا ہے کہ وہ اپنے ماہ جون کے بل مقررہ وقت سے پہلے ادا کریں۔
اعلامیے کے مطابق، مقررہ تاریخ کے بعد بل جمع نہ کرنے والے صارفین کے بجلی کنکشن منقطع کر دیے جائیں گے۔ تمام صارفین سے گزارش کی گئی ہے کہ اگر کسی کو مقررہ تاریخ تک بل موصول نہ ہو، تو وہ فوری طور پر دفتر سے رابطہ کرکے بل حاصل کریں اور وقت پر جمع کروائیں تاکہ بجلی کی سپلائی منقطع ہونے سے بچا جا سکے۔
کیسکو پسنی نے یہ بھی واضح کیا ہے کہ یکم جون 2025 سے نادہندگان کے خلاف سخت آپریشن کا آغاز کر دیا جائے گا۔ وہ صارفین جو اقساط پر بل جمع کرواتے ہیں، انہیں ہدایت کی گئی ہے کہ دفتر سے رابطہ کرکے بل کی قسط مقرر کروائیں اور وقت پر جمع کریں، بصورتِ دیگر ان کا کنکشن بھی منقطع کر دیا جائے گا۔
کیسکو نے حالیہ دنوں میں پسنی شہر کے دونوں سٹی فیڈرز کی بوسیدہ تاروں اور کھمبوں کو پسنی گریڈ اسٹیشن سے پولیس تھانہ پسنی تک مکمل طور پر تبدیل کر کے نئی تنصیب مکمل کی ہے تاکہ عوام کو بلاتعطل بجلی سپلائی مہیا کی جا سکے۔ اس کے بدلے کیسکو صرف وقت پر بلوں کی مکمل ادائیگی چاہتا ہے۔
ترجمان کیسکو پسنی نے کہا ہے کہ صارفین بروقت بل جمع کرکے بڑھتی ہوئی لوڈشیڈنگ سے نجات حاصل کر سکتے ہیں۔ کیسکو اپنی معزز صارفین سے بھرپور تعاون کی امید رکھتی ہے۔
