کراچی کے جناح انٹرنیشنل ایئرپورٹ پر غیر ملکی ایئرلائن تھائی ایئر ویز کے بند دفتر سے سٹیشن منیجر کی لاش برآمد ہونے کے واقعے پر پاکستان ایئرپورٹ اتھارٹی (پی اے اے) نے تحقیقات کا حکم دے دیا ہے.
ابتدائی میڈیکل رپورٹ میں موت کی وجہ دل کا دورہ قرار دی جا رہی ہے۔
پاکستان ایوی ایشن کے ترجمان نے انڈپینڈنٹ اردو سے گفتگو میں بتایا کہ ‘لاش ہفتے کی رات تقریباً ساڑھے سات بجے ملی۔‘
ان کے مطابق: ’جب آج تھائی ایئر کے ریپریزنٹیٹو نے دفتر کھولا تو ملازم کمرے میں صوفے پر پڑے ہوئے تھے، جس کے بعد متعلقہ اداروں کو اطلاع دی گئی۔‘
ترجمان کے مطابق جناح ٹرمینل کی چوتھی منزل پر واقع تھائی ایئر کے بند دفتر سے برآمد ہونے والی لاش کی شناخت مرزا عرفان بیگ کے نام سے ہوئی ہے۔
اس سیکشن میں متعلقہ حوالہ پوائنٹس شامل ہیں (Related Nodes field)
پی اے اے کے ترجمان کے مطابق: ’واقعے کی ابتدائی انکوائری شروع کر دی گئی ہے جبکہ ایئرپورٹ سکیورٹی فورس (اے ایس ایف) کو ہدایت کی گئی ہے کہ قریبی سی سی ٹی وی فوٹیج محفوظ کی جائے۔‘
ترجمان نے بتایا کہ پولیس اور میڈیکل ٹیموں کو بھی فوری طور پر اطلاع دے دی گئی ہے اور تفتیش مکمل ہونے کے بعد تفصیلی رپورٹ پیش کی جائے گی۔
ایئرپورٹ پر تعینات وفاقی محکمہ صحت کے ڈاکٹر نے ابتدائی معائنے کے بعد ڈیتھ سرٹیفکیٹ جاری کر دیا ہے۔ ڈاکٹر کی رپورٹ کے مطابق موت دل کا دورہ پڑنے سے ہونے کا امکان ظاہر کیا گیا ہے تاہم حتمی وجہ موت مزید تحقیقات کے بعد سامنے آئے گی۔
ترجمان پی اے اے کا کہنا ہے کہ تفتیش مکمل ہونے کے بعد واقعے سے متعلق تفصیلی رپورٹ پیش کی جائے گی جبکہ تمام ممکنہ پہلوؤں کو مدنظر رکھتے ہوئے تحقیقات کو آگے بڑھایا جا رہا ہے۔
