پاکستان کی وزارت داخلہ نے بدھ کو بتایا ہے کہ اٹلی نے پاکستانی شہریوں کو دس ہزار سے زائد ویزے جاری کرنے اور سفارتی پاسپورٹ رکھنے والوں کو ویزا شرط سے مستثنیٰ قرار دینے کا اعلان کیا ہے۔
یہ پیش رفت پاکستان کے وزیرِ داخلہ محسن نقوی اور اٹلی کے ہم منصب کے درمیان ملاقات کے دوران ہوئی، جس میں داخلی سلامتی کے تعلقات اور غیر قانونی امیگریشن کی روک تھام کے اقدامات کا جائزہ لیا گیا۔
پاکستان نے 2023 میں غیر قانونی امیگریشن کے خلاف کارروائیاں تیز کر دیں، جب یونان کے ایک قصبے کے قریب ایک کشتی ڈوبنے سے سینکڑوں تارکینِ وطن، جن میں متعدد پاکستانی بھی شامل تھے، جان سے گئے۔ یہ سانحہ بحیرۂ روم کے مہلک ترین حادثات میں شمار ہوتا ہے۔
حکام مسلسل ان سمگلنگ نیٹ ورکس کے خلاف کارروائیاں کر رہے ہیں جو شہریوں کو خطرناک راستوں سے بیرونِ ملک بھیجتے ہیں، جبکہ ہوائی اڈوں پر نگرانی سخت کی گئی ہے اور جعلی دستاویزات میں ملوث افراد کی گرفتاریاں عمل میں آئی ہیں۔
اٹلی کے اعلان کے حوالے سے پاکستان کی وزارت داخلہ نے ایک بیان میں کہا ہے کہ ’پیانتیڈوسی کا کہنا ہے کہ ’قانونی امیگریشن کو فروغ دینے کے لیے پاکستان کی ہنرمند افرادی قوت کے لیے 10,500 ورک ویزے جاری کیے جائیں گے۔‘
انہوں نے مزید کہا کہ وزیر داخلہ محسن نقوی کی درخواست پر پاکستانی سفارتی پاسپورٹ ہولڈرز کو اطالوی ویزا سے استثنیٰ دیا جائے گا۔
وزارت داخلہ کے مطابق ملاقات میں منشیات کی سمگلنگ، انسانی سمگلنگ اور شدت پسندی کے خلاف مؤثر تعاون کو مزید مضبوط بنانے پر بھی بات چیت ہوئی۔
اس سیکشن میں متعلقہ حوالہ پوائنٹس شامل ہیں (Related Nodes field)
بیان کے مطابق محسن نقوی نے کہا کہ ہوائی اڈوں اور سمندری سرحدوں پر سخت نگرانی سے غیر قانونی سفر میں کمی آئی ہے۔
وزارت داخلہ نے پیانتیڈوسی کے حوالے سے مزید کہا کہ ’انسانی سمگلنگ اور منشیات کی روک تھام میں پاکستانی اداروں کی کامیابیاں قابلِ تحسین ہیں۔ ہم قانونی امیگریشن کے فروغ کے لیے باہمی تعاون میں اضافہ کریں گے۔‘
پاکستان نے گذشتہ سال بتایا تھا کہ 2025 میں یورپ کی جانب غیر قانونی سفر میں 47 فیصد کمی آئی، جبکہ ملک گیر کریک ڈاؤن کے دوران 1,700 سے زائد انسانی سمگلرز کو گرفتار کیا گیا۔
دسمبر میں حکومت نے اسلام آباد میں مصنوعی ذہانت پر مبنی امیگریشن سکریننگ سسٹم متعارف کروانے کا بھی اعلان کیا، تاکہ جعلی سفری دستاویزات کی نشاندہی اور غیر قانونی روانگی کو روکا جا سکے۔
