صوبہ پنجاب کے ضلع چنیوٹ میں چوری کا ایک نرالا واقعہ پیش آیا، جس میں تین باپ بیٹوں نے اپنے گھر سے قریبی گودام تک 100 فٹ لمبی زیر زمین سرنگ کھودی اور تقریباً دو لاکھ روپے مالیت کا چاول لے اڑے۔
ایک ملزم واردات کے بعد کسی دوسرے مقدمے میں گرفتار ہوا، جبکہ دو کی تلاش جاری ہے۔
یہ عجیب اور دلچسپ واردات ضلع چنیوٹ کے علاقے لنگرانہ میں پیش آئی، جہاں تفتیشی افسر محمد ساجد نے انڈپینڈنٹ اردو کو بتایا کہ ’ملزم ملک شیر اور اس کے دو بیٹوں ندیم اور ریحان نے اپنے گھر سے قریبی گودام تک 100 فٹ سے زیادہ لمبائی کی سرنگ کھودی اور چاول کی 20۔25 بوریاں چوری کیں۔
چوری کیے گئے چاول کی قیمت ایک لاکھ 70 ہزار روپے بتائی جاتی ہے۔
تفتیشی افسر نے مزید بتایا کہ ملزم ندیم سرنگ والی واردات کا پتہ چلنے سے قبل ہی منشیات کے ایک الگ مقدمے میں گرفتار ہو گیا تھا۔
چوری کا نشانہ بننے والے چاول کے تاجر فاروق طاہر نے انڈپینڈنٹ اردو کو بتایا کہ ’منگل کو مزدوروں نے گودام میں پڑی سینکڑوں دھان (چاول) کی بوریوں میں سے کچھ اٹھانا شروع کیں تو انہیں ایک جگہ زمین میں گڑھا نظر آیا۔
اس سیکشن میں متعلقہ حوالہ پوائنٹس شامل ہیں (Related Nodes field)
’گودام میں ایک طرف سے چاول کی 20۔25 بوریاں بھی کم تھیں۔‘
انہوں نے کہا بتایا کہ ’مزید دیکھنے پر 100 فٹ سے زیادہ لمبی سرنگ نظر آئی جو ایک گھر کے کمرے میں ختم ہو رہی تھی۔‘
فاروق طاہر نے کہا کہ معلوم ہوا کہ سرنگ کے دوسرے سرے پر موجود گھر ملک شیر نامی شخص کا ہے، جو اپنے بیٹوں ریحان اور ندیم کے ہمراہ وہاں رہائش پذیر ہے۔
لنگرانہ پولیس نے مقدمہ درج کرنے کے بعد ثبوت اکٹھا کیے اور اپنی نگرانی میں زیر زمین سرنگ کو بند کروا دیا ہے۔
فاروق طاہر نے کہا کہ ملزمان نے ان کے گودام سے چوری کی گئی دھان آگے فروخت کر دی ہے۔
