وزیرِ اعظم شہباز شریف اقتصادی تعاون تنظیم (ای سی او) کے سربراہی اجلاس میں شرکت کے لیے دو روزہ دورے پر آذربائیجان کے علاقے قرہ باغ کے شہر شوشا پہنچ گئے.
اسلام آباد میں ایوان وزیر اعظم کے مطابق، ’فذولی ہوائی اڈے پر آذربائیجان کے وزیرِ ثقافت عادل کرملی، آذربائیجان کے پاکستان میں سفیر خضر فرہادوف، پاکستان کے آذربائیجان میں سفیر قاسم محی الدین اور اعلی سفارتی و حکومتی اہلکاروں نے وزیرِ اعظم و پاکستانی وفد کا استقبال کیا۔‘
نائب وزیرِ اعظم و وزیرِ خارجہ محمد اسحاق ڈار، وفاقی وزیرِ اطلاعات و نشریات عطاء اللہ تارڑ اور معاون خصوصی طارق فاطمی وزیرِ اعظم کے ہمراہ وفد میں شریک ہیں۔
وزیرِ اعظم شہباز شریف خانکندی میں اقتصادی تعاون تنظیم کے سربراہی اجلاس میں شرکت اور خطاب کریں گے۔
3 جولائی 2025 کی اس تصویر میں آذتبائیجان کے وزیر ژقافت عادل کریملی وزیراعظم شہباز شریف کا فزولی ایئرپورٹ پر استقبال کر رہے ہیں (ایوان وزیراعظم، اسلام آباد)
وزیرِ اعظم سربراہی اجلاس میں شریک عالمی رہنماوں سے اہم ملاقاتیں بھی کریں گے۔
اس سے قبل جمعرات کی صبح وزیر اعظم شہباز شریف آذربائیجان کے دارالحکومت باکو میں شروع ہونے والے اقتصادی تعاون تنظیم کے دو روزہ 17ویں سربراہی اجلاس میں شرکت کے لیے روانہ ہوئے تھے۔
اجلاس کا موضوع ہے ’پائیدار اور ماحولیاتی لحاظ سے مضبوط مستقبل کے لیے نئی ECO وژن۔‘
اس سیکشن میں متعلقہ حوالہ پوائنٹس شامل ہیں (Related Nodes field)
دفتر خارجہ کے ایک بیان کے مطابق سربراہی اجلاس کے دوران، وزیر اعظم پاکستانی وفد کی قیادت کریں گے اور اہم علاقائی و عالمی چیلنجز پر پاکستان کا نقطۂ نظر پیش کریں گے۔
بیان میں بتایا گیا کہ وہ ECO وژن 2025 سے پاکستان کے عزم کا اعادہ کریں گے اور خطے کے اندر تجارت، ٹرانسپورٹ رابطوں، توانائی کے تعاون اور پائیدار ترقی کو فروغ دینے کی حمایت کریں گے۔
اجلاس کے موقعے پر وہ دیگر ECO رہنماؤں سے دو طرفہ ملاقاتیں کریں گے جن میں باہمی دلچسپی کے امور پر تبادلہ خیال کیا جائے گا۔
