کراچی میں پولیس نے جمعے کو بتایا کہ ایک پانچ منزلہ عمارت گرنے سے آٹھ افراد جان سے چلے گئے اور نو زخمی ہوئے ہیں، جب کہ مزید لوگ ملبے تلے دبے ہوئے ہیں۔
خبر رساں ایجنسی اے ایف پی کے مطابق یہ واقعہ صبح تقریباً 10 بج کر 10 منٹ پر پیش آیا جس کے بعد امدادی کارکنوں اور علاقہ مکینوں نے مل کر ملبے سے لوگوں کو نکالا۔
سینیئر مقامی پولیس افسر عارف عزیز نے بتایا ’اب تک ہم نے پانچ لاشوں اور چھ زخمی افراد کو نکال لیا ہے۔‘
انہوں نے مزید کہا کہ عمارت میں تقریباً 100 افراد رہائش پذیر تھے۔
امدادی کارروائی کی قیادت کرنے والے ایدھی فاؤنڈیشن کے سعد ایدھی نے بتایا کہ ’کم از کم مزید آٹھ سے 10 لوگ ملبے تلے دبے ہو سکتے ہیں۔‘
انہوں نے عمارت کو ’خستہ حال‘ قرار دیا۔ سعد ایدھی نے اموات کی تعداد چار بتائی۔
عمارت کے ایک رہائشی 30 سالہ شنکر کامہو جو اس وقت باہر تھے، نے اے ایف پی کو بتایا کہ عمارت میں تقریباً 20 خاندان رہتے تھے۔
انہوں نے بتایا کہ ’مجھے میری بیوی کی طرف سے فون آیا کہ عمارت میں شگاف پڑ رہا ہے اور میں نے اسے فوراً باہر نکلنے کو کہا۔
’وہ پڑوسیوں کو خبردار کرنے گئی، لیکن ایک عورت نے اسے بتایا کہ ‘یہ عمارت مزید 10 سال تک کھڑی رہے گی۔‘ میری بیوی بیٹی کو لے کر باہر نکل گئی اور تقریباً 20 منٹ بعد عمارت گر گئی۔‘
عمارتوں اور چھتوں کے گرنے کے واقعات پاکستان میں عام ہیں کیوں کہ ملک میں تعمیراتی معیار ناقص ہے اور عموماً غیر معیاری تعمیراتی سامان استعمال کیا جاتا ہے۔
اس سیکشن میں متعلقہ حوالہ پوائنٹس شامل ہیں (Related Nodes field)
جون 2020 میں شہر کے اسی علاقے میں تقریباً 40 اپارٹمنٹس پر مشتمل رہائشی عمارت گرنے سے کم از کم 18 افراد جان سے چلے گئے تھے۔
پاکستان میں چھتوں اور عمارتوں کے گرنے کی بنیادی وجہ 240 ملین سے زیادہ آبادی والے جنوبی ایشیائی ملک میں ناقص حفاظتی معیارات اور ناقص تعمیراتی مواد ہے۔
لیکن کراچی، جو کہ دو کروڑ سے زیادہ آبادی کا شہر ہے، خاص طور پر ناقص تعمیرات، غیر قانونی توسیعات، عمر رسیدہ انفراسٹرکچر، زیادہ بھیڑ اور عمارت کے ضوابط کے نفاذ کے لیے بدنام ہے۔
وزیر اعلیٰ سندھ سید مراد علی شاہ نے واقعے کا نوٹس لیتے ہوئے متعلقہ حکام کو فوری رپورٹ پیش کرنے کی ہدایت کی ہے۔
وزیر اعلیٰ ہاؤس سے جاری بیان کے مطابق انہوں نے ریسکیو ٹیموں کو ہدایت دی کہ ملبے تلے دبے افراد کو نکالنے کے لیے ہر ممکن اقدامات کیے جائیں اور زخمیوں کو فوری طبی امداد فراہم کی جائے۔
بیان میں کہا گیا کہ مراد علی شاہ نے سندھ بلڈنگ کنٹرول اتھارٹی سے شہر بھر میں موجود بوسیدہ اور خستہ حال عمارتوں کی فوری تفصیلات طلب کرتے ہوئے کہا کہ خطرناک عمارتوں کی بروقت نشاندہی اور شہریوں کی حفاظت کے لیے عملی اقدامات کیے جائیں۔
