بلوچستان کے ضلع قلات میں پولیس کے مطابق مسلح افراد نے بدھ کو ایک مسافر کوچ پر فائرنگ کر کے تین مسافروں کو قتل کر دیا۔ واقعے میں متعدد مسافر زخمی بھی ہوئے۔
قلات پولیس سٹیشن کے ایس ایچ او حبیب نچاری نے انڈپینڈنٹ اردو کو فون پر بتایا کہ کراچی سے کوئٹہ جانے والی مسافر کوچ پر مسلح افراد نے قلات کے قریب نمرغ کے مقام پر اندھا دھند فائرنگ کر دی، جس کے نتیجے میں ابتدائی طور پر تین مسافر جان کی بازی ہار گئے اور سات سے زائد زخمی ہو گئے۔
ایس ایچ او کے مطابق زخمیوں میں خواتین اور بچے بھی شامل ہیں۔
اس سیکشن میں متعلقہ حوالہ پوائنٹس شامل ہیں (Related Nodes field)
انہوں نے مزید بتایا کہ زخمیوں کو طبی امداد کے لیے ہسپتال منتقل کر دیا گیا۔
بلوچستان حکومت کے ترجمان شاہد رند نے میڈیا کو جاری بیان میں کہا کہ قلات کے علاقے نمرغ میں کراچی سے کوئٹہ آنے والی مسافر کوچ پر فائرنگ کا واقعہ رونما ہوا ہے، سکیورٹی ادارے، ضلعی انتظامیہ اور ریسکیو ٹیمیں فوری طور پر جائے وقوعہ پر پہنچ چکی ہیں۔
ترجمان کے مطابق زخمیو کو ڈی ایچ کیو ہسپتال قلات منتقل کیا گیا جبکہ ہسپتال میں ایمرجنسی نافذ کر دی گئی۔
انہوں نے مزید بتایا کہ سکیورٹی فورسز نے علاقے کو گھیرے میں لے لیا ہے اور سرچ آپریشن جاری ہے۔
بقول شاہد رند: ’سکیورٹی فورسز حملہ آوروں کا تعاقب کر رہی ہیں۔‘
