گلگت بلتستان میں حکام کا کہنا ہے کہ قراقرم کے پہاڑی سلسلے میں پیر کو لیلیٰ چوٹی کو سر کرتے ہوئے زخمی ہونے والی جرمن کوہ پیما کو ریسکیو کرنے کی کوششوں میں خراب موسم آڑے آ رہا ہے۔
جرمن کوہ پیما لورا ڈاہلمیئر، جنہوں نے 2017 خواتین کا بائیتھلون ورلڈ کپ بھی جیتا تھا، پیر کو قراقرم کے پہاڑی سلسلے میں لیلیٰ چوٹی سر کرنے کی کوشش کے دوران زخمی ہو گئیں تھیں۔
الپائن کلب آف پاکستان کے ترجمان کرار حیدری نے بدھ کو ایک بیان میں کہا کہ لورا ڈاہلمیئ تک پہنچنے کے لیے زمینی ریسکیو آپریشن شروع کر دیا گیا ہے۔
انہوں نے ایک بیان میں کہا کہ مقامی کوہ پیماؤں، اونچائی پر جانے والے پورٹرز اور چند بین الاقوامی کوہ پیماؤں کی ایک ٹیم، جن میں تین امریکی اور ایک جرمن شامل ہیں، لورا تک پہنچنے کے لیے راستے پر ہیں۔
کرار حیدری نے کہا کہ پاکستانی فوج کے ہیلی کاپٹر اب بھی خراب موسمی حالات کی وجہ سے گراؤنڈ ہیں کیوں کہ بارش اور تیز ہواؤں کے سبب وہ اڑان نہیں بھر سکتے ہیں۔
الپائن کلب کے ترجمان نے بتایا کہ 29 جولائی کو کی گئی ’ایک جاسوسی پرواز نے لورا کے مقام کی تصدیق کر دی، لیکن ہوا سے زندگی کی کوئی واضح نشانیاں نہیں مل سکیں۔‘
سیاحوں کی سکیورٹی کی غرض سے قائم گلگت بلتستان ٹوورازم پولیس کے کنٹرول روم میں تعینات ایک اہلکار نے بھی بدھ کو انڈپینڈنٹ اردو سے گفتگو میں کہا کہ ’خراب موسم کی وجہ سے (فضائی ریسکیو) آپریشن میں مشکلات پیش آ رہی ہیں۔‘
جرمن کوہ پیما لورا ڈاہلمیئر (لورا ڈاہلمیئر انسٹاگرام)
گلگت بلتستان میں حکام نے فرانسیسی خبر رساں ادارے اے ایف پی کو بتایا کہ چوٹی سر کرنے کی کوشش کے دوران زخمی ہونے والی لورا ڈاہلمیئر پہاڑ پر پھنسی ہوئی ہیں۔
انہوں نے مزید کہا کہ منگل کو غروب آفتاب کے بعد تلاش کرنے والی ٹیموں کو ان تک پہنچنے کی کوششوں کو روکنے پر مجبور کر دیا گیا تھا۔
گلگت بلتستان کی علاقائی حکومت کے ترجمان فیض اللہ فراق نے بتایا کہ 31 سالہ لورا ڈاہلمیر اور ان کی ساتھی مرینا ایوا، چڑھائی کے دوران چٹانیں گرنے سے متاثر ہوئیں۔
تاہم مرینا ایوا منگل کو ریسکیو ٹیم کی مدد سے بیس کیمپ میں اترنے میں کامیاب ہو گئی تھیں۔
اس سیکشن میں متعلقہ حوالہ پوائنٹس شامل ہیں (Related Nodes field)
شمالی پاکستان میں ہر سال سینکڑوں کوہ پیما پہاڑوں کو سر کرنے کی کوشش کرتے ہیں اور برفانی تودے گرنے اور موسم کی اچانک تبدیلیوں کی وجہ سے حادثات عام ہیں۔
پاکستان کا خوبصورت شمال، جو سیاحوں اور کوہ پیماؤں دونوں کے لیے کشش رکھتا ہے، معمول سے زیادہ موسمی بارشوں کے بعد سیلاب اور لینڈ سلائیڈنگ سے متاثر ہوا ہے۔
جرمنی میں لورا ڈاہلمیر کے منیجر نے براڈکاسٹر زیڈ ڈی ایف کو بتایا کہ وہ پیر کو دوپہر کے قریب 18700 فٹ کی بلندی پر چٹان گرنے سے شدید زخمی ہو گئی تھیں۔
انہوں نے مزید بتایا کہ علاقہ بہت دور ہونے کی وجہ سے منگل کو صرف ایک ہیلی کاپٹر منگل کی صبح جائے حادثہ تک پہنچ چکا تھا۔
