امریکی صدر ڈونلڈ ٹرمپ نے جمعرات کو کہا کہ وہ افغانستان میں بگرام ایئربیس کو ’واپس حاصل کرنے‘ کے لیے کام کر رہے ہیں۔
افغانستان کے دارالحکومت کابل کے قریب واقعہ بگرام ہوائی اڈے پت امریکہ نے 2021 میں جنگ زدہ ملک پر طالبان کے قبضے سے کچھ ہی دیر قبل کنٹرول چھوڑ دیا تھا۔
ٹرمپ نے برطانوی وزیر اعظم کیئر سٹارمر کے ساتھ ایک پریس کانفرنس میں کہا کہ ’ہم اسے واپس حاصل کرنے کی کوشش کر رہے ہیں، ویسے یہ ایک چھوٹی بریکنگ نیوز ہو سکتی ہے۔ ہم اسے واپس لانے کی کوشش کر رہے ہیں کیونکہ انہیں ہم سے چیزوں کی ضرورت ہے۔‘
ٹرمپ نے مزید کہا کہ ’ہم وہ اڈہ واپس چاہتے ہیں۔
’ہم اڈہ چاہتے ہیں اس کی ایک وجہ یہ ہے، جیسا کہ آپ جانتے ہیں، یہ ایک گھنٹے کی دوری پر ہے جہاں سے چین اپنے جوہری ہتھیار بناتا ہے۔‘
امریکی حکام نے فوری طور پر واضح نہیں کیا کہ ٹرمپ کا کیا مطلب تھا جب انہوں نے کہا کہ واشنگٹن اڈہ واپس لینے کی کوشش کر رہا ہے۔
اس سیکشن میں متعلقہ حوالہ پوائنٹس شامل ہیں (Related Nodes field)
بگرام ایئر بیس، جا افغانستان میں سب سے بڑا ہوائی اڈہ ہے، 9/11 کے حملوں کے بعد طالبان کا تختہ الٹنے کے آپریشن کے بعد دو دہائیوں تک ملک میں امریکی کارروائیوں کا مرکز رہا۔
لیکن امریکی اور نیٹو فوجیوں نے جولائی 2021 میں اڈے سے انخلا کیا کیونکہ طالبان نے آخر کار پورے ملک کا کنٹرول سنبھالنے سے پہلے افغانستان کے بڑے حصے پر قبضہ کر لیا تھا۔
ٹرمپ نے اقتدار میں واپسی کے بعد سے اڈے کے نقصان پر بار بار تنقید کی ہے اور اسے اپنے پیشرو جو بائیڈن کے افغانستان سے امریکی انخلا سے نمٹنے کے حوالے سے کیے گئے حملوں سے جوڑا ہے۔
ٹرمپ نے سپر پاور حریف چین کے افغانستان میں بڑھتے ہوئے اثر و رسوخ کی بھی شکایت کی ہے۔
