وزیراعظم محمد شہباز شریف نے پاکستان فضائیہ کی جانب سے مقامی طور پر تیار کردہ تیمور ویپن سسٹم کے کامیاب فلائٹ ٹیسٹ پر قوم اور پاکستان فضائیہ کو مبارکباد دیتے ہوئے اسے پاکستان کی دفاعی صلاحیتوں میں ایک اہم سنگِ میل قرار دیا ہے۔
وزیراعظم آفس کے پریس ونگ سے جاری بیان کے مطابق وزیراعظم نے اس کامیاب تجربے پر پاکستان فضائیہ کی پیشہ ورانہ مہارت، لگن اور غیر متزلزل عزم کو سراہا اور کہا کہ تیمور ویپن سسٹم کی بدولت ملک کا دفاع مزید مستحکم ہو گا۔
انہوں نے چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر، چیف آف ایئر اسٹاف ایئر چیف مارشل ظہیر احمد بابر سدھو، اور میزائل سسٹم پر کام کرنے والے سائنسدانوں اور انجینئرز کو خراجِ تحسین پیش کیا۔
وزیراعظم کا کہنا تھا کہ یہ کامیاب فلائٹ ٹیسٹ پاکستان کی دفاعی صنعت کی تکنیکی پختگی، جدت اور خود انحصاری کی واضح عکاسی کرتا ہے اور یہ قومی سلامتی کے اہداف کے حصول کے لیے پاکستان فضائیہ کی مسلسل کوششوں کا ثبوت ہے۔
اس سیکشن میں متعلقہ حوالہ پوائنٹس شامل ہیں (Related Nodes field)
آئی ایس پی آر کے مطابق پاکستان فضائیہ نے مقامی طور پر تیار کردہ تیمور ایئر لانچڈ کروز میزائل کا کامیاب فلائٹ ٹیسٹ کیا ہے۔ یہ میزائل 600 کلومیٹر تک زمینی اور بحری اہداف کو انتہائی درستگی کے ساتھ نشانہ بنانے کی صلاحیت رکھتا ہے اور روایتی وارہیڈ سے لیس ہے۔ جدید نیویگیشن اور گائیڈنس سسٹم سے آراستہ یہ میزائل انتہائی کم بلندی پر پرواز کرنے کی صلاحیت رکھتا ہے، جس کے باعث یہ دشمن کے فضائی اور میزائل دفاعی نظام کو مؤثر طور پر چکمہ دے سکتا ہے۔
آئی ایس پی آر کے مطابق اس کامیاب تجربے نے پاکستان کی روایتی دفاعی صلاحیت اور آپریشنل لچک میں نمایاں اضافہ کیا ہے۔ تجربے کے موقع پر پاک افواج کے سینئر افسران کے ساتھ ساتھ ممتاز سائنسدان اور انجینئرز بھی موجود تھے۔
چیف آف ایئر اسٹاف ایئر چیف مارشل ظہیر احمد بابر سدھو نے اس کامیابی پر پاکستان فضائیہ کی ٹیم، سائنسدانوں اور انجینئرز کو مبارکباد دیتے ہوئے کہا کہ یہ کامیابی قومی عزم، تکنیکی خود کفالت اور خطے میں ایک قابلِ اعتماد دفاعی صلاحیت برقرار رکھنے کے عزم کی عکاس ہے۔
