پاکستان کے دفتر خارجہ کے ترجمان طاہر اندرابی نے منگل کو تصدیق کی ہے کہ پاکستان کو ایران اور امریکہ کے درمیان ہونے والے مذاکرات کا ’دعوت نامہ موصول‘ ہو گیا ہے تاہم ان مذاکرات میں پاکستان کی نمائندگی کون کرے گا اس بارے میں تاحال کوئی فیصلہ نہیں کیا گیا ہے۔
دفتر خارجہ نے انڈپینڈنٹ اردو کو بتایا کہ ’مذاکرات کا مقصد ایران اور امریکہ کے درمیان کشیدگی کو کم کرنے میں مدد کرنا ہے۔‘
ایرانی صدر مسعود پیزشکیان نے منگل کو تصدیق کی کہ انہوں نے وزیر خارجہ عباس عراقچی کو ہدایت کی ہے کہ وہ ’منصفانہ مذاکرات‘ کو آگے بڑھائیں بشرطیکہ ’خطرات اور غیر معقول توقعات سے پاک ماحول‘ ہو۔
انہوں نے ایکس پر ایک سلسلہ وار پوسٹ میں کہا ہے کہ یہ مذاکرات ’ہمارے قومی مفادات کے فریم ورک کے اندر‘ ہوں گے۔
اتوار کو سی این این کے ساتھ ایک انٹرویو میں عباس عراقچی نے کہا تھا کہ ’صدر ٹرمپ نے کہا کہ کوئی جوہری ہتھیار نہیں ہوں گے، اور ہم مکمل طور پر متفق ہیں، ہم اس سے مکمل طور پر متفق ہیں، یہ ایک بہت اچھا معاہدہ ہو سکتا ہے۔‘
انہوں نے مزید کہا کہ ’بدلے میں ہم پابندیاں اٹھانے‘ کی توقع رکھتے ہیں۔
اس سیکشن میں متعلقہ حوالہ پوائنٹس شامل ہیں (Related Nodes field)
تاہم، ایرانی وزیر خارجہ نے کہا کہ اگر مذاکرات ناکام ہوتے ہیں تو تہران جنگ کے لیے تیار ہے اور انہوں نے خبردار کیا کہ ممکنہ طور پر ایک تنازع ایران سے آگے بڑھے گا۔
اس سے قبل پیر کو امریکی صدر ڈونلڈ ٹرمپ نے ایران سے مذاکرات کی تصدیق کی ہے جبکہ دونوں ملکوں کے عہدیداران کے درمیان چھ فروری کو استنبول میں بات چیت کا دور متوقع ہے۔
وائٹ ہاؤس میں پیر کو میڈیا سے گفتگو کرتے ہوئے صدر ٹرمپ نے کہا کہ بڑے بڑے امریکی جہاز ایران کی جانب روانہ ہیں۔
تاہم انہوں نے کہا کہ ’ہمارے ایران سے مذاکرات بھی چل رہے ہیں، دیکھیے کیا ہوتا ہے۔‘
انہوں نے خبردار بھی کیا کہ اگر ایران کے ساتھ بات چیت ناکام ہو گئی تو ’کچھ برا‘ ہو سکتا ہے۔
