سعودی عرب میں اب حج و عمرہ کے لیے جانے والے افراد نئے ڈیجیٹل نظام کے ذریعے علما سے سوالات بھی کر سکیں گے۔
مسجد الحرام اور مسجد نبوی میں مذہبی امور کے سربراہ شیخ ڈاکٹر عبدالرحمن السدیس نے زائرین کے سوالات کے جواب دینے کے لیے کلاؤڈ بیسڈ مواصلاتی نظام کا افتتاح کیا۔
عرب نیوز کے مطابق یہ منصوبہ ان کوششوں کا حصہ ہے جن کا مقصد ڈیجیٹل تبدیلی کو فروغ دینا اور حرمین شریفین کے زائرین کو فراہم کی جانے والی دینی خدمات کے معیار کو بہتر بنانا ہے۔
شیخ ڈاکٹر عبدالرحمن السدیس نے کہا ہے کہ یہ نظام ایک مربوط تکنیکی فریم ورک ہے جو کالز کو آسان اور مؤثر انداز میں سنبھالنے کی صلاحیت بہتر بناتا ہے۔
یہ نظام کالز کو شیوخ کے ذاتی فونز پر منتقل کرتا ہے، جس سے مخصوص مقامات پر ان کی موجودگی کی ضرورت کم ہو جاتی ہے، مسجد الحرام میں رش میں کمی آتی ہے اور عبادت گزاروں کے تجربے میں بہتری آتی ہے۔
انہوں نے کہا کہ یہ نظام کالز کے انتظام اور تقسیم کے لیے ایک درست طریقہ کار استعمال کرتا ہے، جس سے فوری جواب اور درست رہنمائی یقینی بنتی ہے۔
اس کے ذریعے کالز کو مسجد الحرام کے ان دفاتر تک بھی منتقل کیا جا سکتا ہے جو سوالات سے متعلق خدمات انجام دیتے ہیں۔ اس سے سروس کے معیار اور آپریشنل کارکردگی میں اضافہ ہوتا ہے۔
اس سیکشن میں متعلقہ حوالہ پوائنٹس شامل ہیں (Related Nodes field)
یہ نظام اعلیٰ درجے کی آپریشنل لچک اور مختلف کام کے حالات سے مطابقت رکھنے کی صلاحیت رکھتا ہے، جبکہ کارکردگی کی نگرانی اور بہتری کے لیے تفصیلی دورانیہ وار رپورٹس بھی فراہم کرتا ہے۔
اس میں کال ریکارڈنگ کی سہولت بھی شامل ہے تاکہ معیار برقرار رکھا جا سکے اور آئندہ حوالہ کے لیے ریکارڈ موجود رہے۔
انہوں نے مزید کہا کہ یہ نظام عمرہ و حج زائرین اور مسجد الحرام کے دیگر مہمانوں کو ممتاز علما تک آسان رسائی فراہم کرنے، خدمات کے معیار کو بہتر بنانے، اور فوری رسائی و درست جواب کے درمیان توازن قائم کرنے کے لیے بنایا گیا ہے۔
’اس سے دینی آگاہی بڑھے گی اور زائرین کے روحانی تجربے میں اضافہ ہوگا۔‘
السدیس نے بتایا کہ کلاؤڈ بیسڈ کال سینٹر کا نمبر 8001222100 ہے، جو 24 گھنٹے فعال رہے گا۔ یہ کالز کو آسان انداز میں تقسیم کرتا ہے اور خودکار طور پر کالر کو قریب ترین دستیاب عالم سے جوڑ دیتا ہے، جس سے انتظار کا وقت کم اور سروس کی کارکردگی بہتر ہوتی ہے۔
انہوں نے مزید کہا کہ یہ نظام روایتی مفت ٹیلی فون سسٹم کے ساتھ مل کر کام کرے گا، تاکہ زیادہ سے زیادہ افراد کو کم سے کم وقت میں خدمات فراہم کی جا سکیں اور دنیا بھر میں حرمین شریفین کے اعتدال پسند پیغام کو فروغ دیا جا سکے۔