ایپل کی سب سے بڑی نئی ریلیز کوئی پروڈکٹ یا فیچر نہیں بلکہ ایک چیز ہے جسے کمپنی نے ’لیکویڈ گلاس‘ (Liquid Glass) کا نام دیا ہے۔
یہ روایتی معنوں میں کوئی مادی شے نہیں اور حقیقت میں اس کا کوئی جسمانی وجود نہیں۔
یہ ایک تصور ہے جو ایپل کی تمام مصنوعات کے سافٹ ویئر میں ایک جامع تبدیلی کی بنیاد بنے گا اور اس سے ایپل واچ کی چھوٹی سکرین سے لے کر ٹی وی کی بڑی سکرین تک ہر چیز کی ظاہری شکل بدل جائے گی۔
سادہ ترین الفاظ میں کہا جائے تو ’لیکویڈ گلاس‘ سافٹ ویئر کی ایک نئی شکل ہے۔ اس کی بنیادی خوبی یہ ہے کہ یہ موجودہ ڈیزائن کے مقابلے میں زیادہ شفاف اور چمک دار ہے۔
لیکن یہ تبدیلیاں صرف ظاہری شکل تک محدود نہیں بلکہ پورے سسٹم پر اثر انداز ہوں گی۔
اس سے ایپل کے آلات پر کنٹرولز اور ایپ آئیکنز کی شکل و صورت بدل جائے گی اور یہ ہر جگہ نظر آئیں گی جہاں ایپل مصنوعات استعمال ہو رہی ہوں گی۔
لیکویڈ گلاس نئے آپریٹنگ سسٹمز کے اپ ڈیٹس کا حصہ ہے جن کا اعلان پیر کو ایپل کی ورلڈ وائیڈ ڈیویلپر کانفرنس میں کیا گیا۔
یہ اپ ڈیٹس اس سال کے آخر میں عام صارفین کے لیے جاری ہوں گی اور یہ iOS، iPadOS، macOS اور tvOS پر دستیاب ہوں گی۔
(ایپل)
یہ نیا انداز ایپل کے ہیڈ سیٹ ’ویژن پرو‘ سے متاثر ہے، جسے پہلی بار دو سال قبل متعارف کروایا گیا تھا۔
اس ڈیوائس میں شفاف اور شیشے جیسے اثرات موجود تھے، جس کی بدولت ایک ونڈو کے پیچھے کی ونڈو بھی نظر آ سکتی تھی، لیکن نئے سافٹ ویئر میں یہ تصور مزید نکھر گیا ہے۔
اس سیکشن میں متعلقہ حوالہ پوائنٹس شامل ہیں (Related Nodes field)
اب یہ شیشے جیسا انداز اردگرد کے مواد اور حرکت کے مطابق خود کو بدل سکتا ہے، جس کے بارے میں ایپل کا دعویٰ ہے کہ یہ ’حقیقی دنیا کے شیشے کی طرح برتاؤ کرتا ہے۔‘
لیکویڈ گلاس کی پہلی جھلک غالباً لاک سکرین پر نظر آئے گی، جہاں وقت اور دیگر عناصر کے لیے شیشے جیسا انداز استعمال کیا گیا ہے۔ ایپل نے اپنی ایپس کو بھی اس نئے انداز میں دوبارہ ڈیزائن کیا ہے۔
تیسری پارٹی کی ایپس کے ڈویلپرز بھی اس ڈیزائن کو اپنا سکیں گے۔ ایپل کا کہنا ہے کہ وہ ایسی ٹیکنالوجی فراہم کرے گا جس سے ڈویلپرز اپنی ایپس کو باآسانی اس نئے ڈیزائن سے ہم آہنگ کر سکیں گے۔
ایپل نے سافٹ ویئر کو مزید حسبِ منشا بنانے کے لیے نئے اختیارات بھی متعارف کروائے ہیں، جیسے کہ macOS میں فولڈرز کا رنگ بدلنا، سکرین کے لیے نئے رنگوں کے شیڈز اور شفاف مینو بار۔
’لیکویڈ گلاس‘ شاید ان نئے ایپل ڈیوائسز کی طرف بھی اشارہ ہے جو مستقبل میں آنے والی ہیں۔
ایپل نے واضح طور پر کہا ہے کہ یہ نیا ڈیزائن نئی نسل کی مصنوعات کے لیے بنیاد فراہم کرتا ہے۔
یہ ابھی واضح نہیں کہ اس سے مراد کیا ہے، لیکن امکان ہے کہ ایپل ایسی ڈیوائسز تیار کر رہا ہو جو اپنے شیشے جیسے ہارڈویئر کو زیادہ نمایاں طور پر استعمال کریں گی۔
