کیسکو پسنی کا نادہندگان کیخلاف کریک ڈاؤن، متعدد علاقوں کے ٹرانسفارمر بند
پسنی ( روزنامہ ایگل حب ) کیسکو پسنی نے بجلی بل نادہندگان کیخلاف جاری آپریشن کو مزید سخت کرتے ہوئے پسنی، اورماڑہ اور دریجی کے مختلف علاقوں میں ٹرانسفارمرز کے لنک اتار دیے اور کئی علاقوں کی بجلی منقطع کر دی۔ اس اقدام کا مقصد ماہ جون 2025 کے ریکوری اہداف کو پورا کرنا ہے۔
ذرائع کے مطابق وہ علاقے جہاں بجلی بلوں کی ادائیگی کی شرح کم ہے، وہاں ٹرانسفارمرز کو مکمل طور پر بند کر دیا گیا ہے۔ تاہم، جن صارفین نے بجلی بند ہونے کے بعد اپنے واجبات ادا کیے، ان کی بجلی سپلائی فوری طور پر بحال کر دی گئی ہے۔
کیسکو حکام کا کہنا ہے کہ ہیڈ آفس کی ہدایات کی روشنی میں یہ کارروائیاں جاری ہیں، اور جہاں تک ممکن ہو رہا ہے، ریکوری اہداف کے حصول کو یقینی بنایا جا رہا ہے۔ حکام نے متعلقہ علاقوں کے کونسلران، معتبرین اور ذمے داران سے اپیل کی ہے کہ وہ بجلی بلوں کی بروقت ادائیگی کے لیے عوام کو قائل کریں اور کیسکو کے واجبات کی وصولی میں اپنا کردار ادا کریں۔
کیسکو ترجمان کے مطابق، "ہم ہر موسم، ہر وقت اپنی صارفین کی خدمت میں مصروف عمل ہیں۔ سخت گرمی ہو یا بارش، ہم نے ہمیشہ گھروں کو روشن رکھا ہے۔ اب وقت ہے کہ صارفین بھی اپنی ذمے داری نبھاتے ہوئے بجلی بلوں کی بروقت ادائیگی کو یقینی بنائیں تاکہ بجلی کی فراہمی بغیر کسی تعطل کے جاری رکھی جا سکے۔”
کیسکو نے صارفین سے اپیل کی ہے کہ وہ جون کے مہینے کی ریکوری اہداف کی تکمیل کے ساتھ ساتھ آئندہ بھی مقررہ وقت پر بجلی بل جمع کروا کر ادارے کے ساتھ تعاون جاری رکھیں۔
