چین کے ایک عسکری تحقیقاتی ادارے نے ایسا جاسوس ڈرون تیار کیا ہے جو جسامت اور شکل میں بالکل مچھر جیسا ہے۔
یہ ننھا سا بغیر پائلٹ فضائی آلہ (یو اے وی) نہایت باریک ٹانگوں اور دو پروں پر مشتمل ہے اور اسے سمارٹ فون کے ذریعے کنٹرول کیا جا سکتا ہے۔
چین کے صوبہ ہونان میں واقع نیشنل یونیورسٹی آف ڈیفنس ٹیکنالوجی (NUDT) کے محققین نے یہ مچھر نما ڈرون تیار کیا ہے۔ اس میں ایسے سینسرز نصب ہیں جو اسے خفیہ فوجی آپریشنز کے لیے مؤثر بناتے ہیں۔
چینی سرکاری فوجی چینل سی سی ٹی وی 7 سے بات کرتے ہوئے این یو ڈی ٹی کے طالب علم لیانگ ہی شیانگ نے کہا ’یہ جو روبوٹ میرے ہاتھ میں ہے، یہ مچھر جیسا ہے۔ اس قسم کے ننھے حیاتیاتی طرز کے روبوٹس خاص طور پر معلوماتی جاسوسی اور میدان جنگ میں خصوصی مشنوں کے لیے موزوں ہیں۔‘
اپریل میں امریکہ کی ہارورڈ یونیورسٹی کے مائیکرو روبوٹکس لیب نے اپنے ’روبو بی‘ ڈرون کا نیا ورژن پیش کیا، جو کرین فلائی (لمبے پروں والا کیڑا) کی طرح اڑنے اور اترنے کی صلاحیت رکھتا ہے۔
محققین کا کہنا ہے کہ اس ڈرون کو ماحولیاتی نگرانی اور قدرتی آفات کی صورت میں سرویلنس کے لیے استعمال کیا جا سکتا ہے، جبکہ مستقبل میں اسے مصنوعی پولینیشن (زر افشانی) جیسے مقاصد کے لیے بھی بروئے کار لایا جا سکتا ہے۔
ہارورڈ کی پوسٹ ڈاکٹریٹ محقق ایلیسا ہرنینڈز نے کہا ’روبو بی حیاتیات اور روبوٹکس کے ملاپ کو جانچنے کے لیے ایک بہترین پلیٹ فارم ہے۔ کیڑوں کی ناقابل یقین حیاتیاتی اقسام سے متاثر ہو کر ہم روبوٹس میں مسلسل بہتری لا سکتے ہیں۔
’اس کے برعکس ہم ان روبوٹک پلیٹ فارمز کو حیاتیاتی تحقیق کے ٹولز کے طور پر استعمال کر کے ایسے تجربات بھی کر سکتے ہیں جو حیاتیاتی میکانزم کے مفروضوں کو پرکھتے ہیں۔‘
روبو بی اصلی کیڑے کی طرح اُڑنے، غوطہ لگانے اور معلق رہنے کی صلاحیت رکھتا ہے (
ہارورڈ مائیکرو روبوٹکس لیب)
اس سیکشن میں متعلقہ حوالہ پوائنٹس شامل ہیں (Related Nodes field)
امریکی فوج بھی نارویجن کمپنی سے مائیکرو ڈرونز خرید چکی ہے جنہیں سرویلنس مشنز میں استعمال کیا جاتا ہے۔
ان ’بلیک ہارنیٹ‘ ڈرونز میں کیمرے اور تھرمل امیجنگ کی سہولت ہوتی ہے اور یہ اتنے چھوٹے ہیں کہ جیب میں سما سکتے ہیں۔
2006 سے امریکی محکمہ دفاع کی خفیہ تجربہ گاہ ڈی اے آر پی اے (DARPA) ہائبرڈ انسیکٹ ڈرونز پر بھی کام کر رہی ہے۔
ان میں چھوٹے الیکٹرانک آلات کو حقیقی کیڑوں میں نصب کر کے ’سائبورگ‘ کیڑوں میں تبدیل کر دیا جاتا ہے۔
یہ سائبورگ کیڑے بجلی کے سگنلز کے ذریعے کنٹرول کیے جا سکتے ہیں۔ اس میں لال بیگ اور بھونروں کو نگرانی کے مقاصد کے لیے استعمال کیا جا رہا ہے۔
