چربندر کے عوامی مسائل پر سیٹھ شربت گل اور لالا سیلانی کی اہم ملاقات
پسنی (روزنامہ ایگل حب بلوچستان )فائبر سسٹم تاحال غیر فعال، عمانی ہسپتال سے چربندر تک سڑکوں کی عدم فراہمی پر تشویش کا اظہار
چربندر کے عوامی مسائل کے حل کے حوالے سے ایک اہم ملاقات سیٹھ شربت گل اور لالا سیلانی کے درمیان ہوئی۔ ملاقات میں علاقے کی پسماندگی اور بنیادی سہولیات کی کمی پر تفصیلی گفتگو کی گئی۔ رہنماؤں نے اس بات پر افسوس کا اظہار کیا کہ کئی سال گزرنے کے باوجود چربندر کے عوام کو وہ سہولیات میسر نہیں جو بنیادی انسانی ضروریات میں شمار ہوتی ہیں۔
سیٹھ شربت گل اور لالا سیلانی نے کہا کہ فائبر سسٹم کے منصوبے کو کئی سال قبل مکمل دکھایا گیا، مگر حقیقت یہ ہے کہ چربندر کے عوام آج بھی انٹرنیٹ اور ٹیلی کمیونیکیشن سہولت سے محروم ہیں۔ طلباء، کاروباری حضرات اور عام شہریوں کو جدید دور میں بھی رابطے کے اس فقدان کی وجہ سے شدید مشکلات کا سامنا ہے۔
علاقے میں سڑکوں کی خستہ حالی پر بھی شدید تحفظات کا اظہار کیا گیا۔ رہنماؤں نے کہا کہ عمانی ہسپتال سے چربندر تک سڑکوں کی عدم فراہمی نے عوام کی زندگی اجیرن بنا دی ہے۔ مریضوں کو بروقت طبی امداد تک پہنچانے میں دشواریاں پیش آتی ہیں جبکہ عام ٹرانسپورٹ اور تجارتی سرگرمیاں بھی متاثر ہو رہی ہیں۔
بلوچستان حکومت سے فوری اقدامات کا مطالبہ
سیٹھ شربت گل اور لالا سیلانی نے حکومت اور متعلقہ اداروں سے پرزور مطالبہ کیا کہ عوامی مسائل کو سنجیدگی سے لیا جائے۔ فائبر سسٹم کو فوری طور پر فعال کیا جائے اور سڑکوں کی تعمیر و بحالی کے منصوبے شروع کیے جائیں تاکہ عوام کو ریلیف مل سکے۔
انہوں نے کہا کہ چربندر کے عوام محب وطن اور محنت کش ہیں لیکن بنیادی سہولیات کی کمی نے ان کی زندگیوں کو مشکل بنا دیا ہے۔ ریاست کی ذمہ داری ہے کہ وہ ان مسائل کو ترجیحی بنیادوں پر حل کرے۔
