سٹی چیئرمین پسنی بابا نور احمد کلمتی اور وائس چیئرمین فہیم جوہر کی کیسکو آفس آمد، بجلی کے مسائل پر ایس ڈی او حبیب الرحمان سے ملاقات
پسنی (رپورٹ: روزنامہ ایگل حب بلوچستان )
سٹی چیئرمین پسنی بابا نور احمد کلمتی اور وائس چیئرمین فہیم جوہر نے پسنی شہر میں جاری بجلی کے سنگین مسائل کے حل کے لیے کیسکو آفس کا دورہ کیا، جہاں انہوں نے ایس ڈی او کیسکو پسنی حبیب الرحمان سے ملاقات کی۔ اس موقع پر کونسلر محمد جدگال اور نیشنل پارٹی کے رہنما ندیم یاسین بھی ان کے ہمراہ موجود تھے۔
ملاقات کے دوران کلانچی محلہ اور باغ بازار سمیت دیگر علاقوں میں بجلی کی طویل بندش، کم وولٹیج اور خراب ٹرانسفارمرز جیسے مسائل پر تفصیلی تبادلہ خیال کیا گیا۔ عوامی نمائندوں نے مطالبہ کیا کہ کیسکو فوری اقدامات کرے تاکہ شہریوں کو درپیش مشکلات کم ہو سکیں۔
ایس ڈی او کیسکو حبیب الرحمان نے وفد کو یقین دہانی کرائی کہ متعلقہ علاقوں میں جلد بہتری لائی جائے گی اور بجلی سے متعلق تمام مسائل ترجیحی بنیادوں پر حل کیے جائیں گے۔
