سندھ پولیس کے مطابق کراچی کے علاقے لانڈھی میں جمعے کی شب ایکسپورٹ پروسیسنگ زون میں واقع ایک فیکٹری میں آتشزدگی کا واقعہ پیش آیا ہے جسے بجھانے کی کوشش کی جا رہی ہے۔
ترجمان سندھ پولیس نے سوشل میڈیا پر اپنے بیان میں بتایا ہے کہ متاثرہ فیکٹری اور اطراف کے علاقوں کو محفوظ بنانے کی کوشش کی جا رہی ہے۔
ریسکیو اور فائربریگیڈ کے اہلکار آتشزدگی کے مقام پر موجود ہیں اور آگ پر قابو پانے کی کوشش کی جا رہی ہے۔
ایدھی ترجمان محمد اویس نے انڈپینڈنٹ اردو کو بتایا کہ لانڈھی میں پلاسٹک فیکٹری میں لگنے والی آگ پر کافی حد تک قابو پا لیا گیا ہے۔
ان کے مطابق اس واقعے میں تاحال کسی جانی نقصان کی اطلاعات نہیں ہیں۔
حالیہ دنوں میں کراچی میں آتشزدگی کے کئی چھوٹے بڑے واقعات ہو چکے ہیں۔
اس سیکشن میں متعلقہ حوالہ پوائنٹس شامل ہیں (Related Nodes field)
17 جنوری 2026 کو کراچی کے شاپنگ مال گل پلازہ میں آتشزدگی کا واقعہ پیش آیا جس میں 60 سے زیادہ افراد جان سے گئے تھے۔
جبکہ دو فروری کو صدر کی ایک موبائل مارکیٹ میں آتشزدگی کے بعد اس آگ پر بغیر کسی بڑے نقصان کے قابو پا لیا گیا تھا۔
جبکہ نومبر 2023 میں کراچی کے RJ شاپنگ مال میں نومبرکو لگنے والی آگ میں کم از کم 11 افراد جان سے گئے اور درجنوں زخمی ہوئے۔
ماہرین کے مطابق کراچی میں آگ لگنے کے واقعات زیادہ تر شارٹ سرکٹ، ناقص وائرنگ، گیس لیکیج، حفاظتی انتظامات کی کمی اور غفلت کی وجہ سے ہوتے ہیں۔
کراچی فائر ڈیپارٹمنٹ کے مطابق کراچی میں ہر سال ہزاروں آگ کے واقعات رپورٹ ہوتے ہیں۔
