نیشنل پارٹی کیچ کے ضلعی ترجمان نے اپنے ایک بیان میں کہا ہے کہ ایران بارڈر کی بندش اور تلار چیک پوسٹ پر عوام کے ساتھ ناروا سلوک کے خلاف نیشنل پارٹی، آل پارٹیز، انجمن تاجران اور بارڈر کمیٹیوں کی جانب سے مشترکہ طور پر شروع کی گئی احتجاجی تحریک اور پارلیمنٹ کے فلور پر مؤثر آواز اُٹھانے کے مثبت نتائج سامنے آنے لگے ہیں۔
ڈاکٹر عبدالمالک بلوچ کی قیادت اور کوششوں کے نتیجے میں قوی امکان ہے کہ آئندہ ہفتے تک ایران بارڈر دوبارہ کھول دیا جائے گا، جبکہ تلار چیک پوسٹ پر گاڑیوں کو بلاجواز روکنے اور عوام کو ہراساں کرنے کا سلسلہ بھی ختم کیا جا چکا ہے، جو کہ ایک خوش آئند پیش رفت ہے۔
انہوں نے کہا کہ نیشنل پارٹی، ڈاکٹر عبدالمالک بلوچ، آل پارٹیز، انجمن تاجران اور بارڈر کمیٹیوں کے تمام نمائندے اس بات کے مستحق ہیں کہ ان کی کاوشوں کو سراہا جائے۔ انہوں نے سنگین نوعیت کے عوامی مسائل کو حل کرنے میں جو فعال کردار ادا کیا، وہ قابلِ تحسین ہے۔ کیچ کے عوام اُن تمام افراد اور اداروں کے شکر گزار ہیں جنہوں نے اس مسئلے کو سنجیدگی سے لیا اور عملی اقدامات کیے۔
